БАСТАУЫШ СЫНЫП ОҚУШЫЛАРЫНЫҢ СЫНИ ОЙЛАУЫН ВИЗУАЛДЫ ӘДІСТЕР АРҚЫЛЫ ҚАЛЫПТАСТЫРУ

Аңдатпа

Білім беру жүйесінде біздің алдымызда тұрған міндеттердің бірі - сыни тұрғыдан ойлау дағдысы қалыптасқан оқушы тұлғасын дамыту. Зерттеудің теориялық және әдістемелік негіздерін айқындау мақсатында отандық және шетелдік ғалымдардың зерттеулеріне талдау жасап, «сыни тұрғыда ойлау» ұғымы әр түрлі ғылым салаларында қолданылатындығын, көп мағыналы ұғым екенін нақтыладық. Мақаланың мақсаты - визуалды әдістерді бастауыш сынып оқушыларының сыни ойлауын қалыптастырудың құралы ретінде қарастыру. Визуалды әдістер материалды алдын-ала ұйымдастыруға, өз идеяларын ұсынуға, оларды елестетуге мүмкіндік береді. Зертеу нәтижелері жинақтау, салыстыру, жүйелеу әдістері арқылы талданды. Зерттеу жұмыстары 2023 жылдың қыркүйегі мен желтоқсаны аралығында жүргізілді. Зерттеуге Т.Тәжібаев атындағы №47 мектеп-гимназиясы мен З.Космедемьянская атындағы №23  мектеп лицейінің бастауыш сынып оқушылары қатысты. Зерттеу барысында эксперименттің үш кезеңі іске асырылады. Анықтау кезеңінде - «Бастауыш сынып оқушыларының сыни ойлауы» атты диагностикалық әдістеме арқылы оқушылардың сыни ойлау дағдыларының алғашқы нәтижесі алынды; қалыптастыру кезеңінде - визуалды әдістерді қолданудың жолдары; ал, бақылау кезеңінде - тапсырмалардың тиімділігін дәлелдеу мақсатында диагностикалық әдістеме қайта алынып, оның салыстырмалы нәтижесі ұсынылды. Тәжірибелік-эксперименттік жұмыстың нәтижесі көрсеткендей тәжірибелік сыныпта өткізілген тапсырмалардың тиімді түрде ұйымдастырылғаны дәлелденді.