ҚАЛАЛАР ГЕОГРАФИЯСЫН ОҚЫТУДА BILIM ALL МОБИЛЬДІ БАҒДАРЛАМАСЫ МЕН WEB-ПЛАТФОРМАЛАРДЫ ТИІМДІ ПАЙДАЛАНУ

Аңдатпа

Жаһандық перспективада инновациялық онлайн білім беру қарқын дамуда. Инновациялық білім беру елдер мен аймақтардағы білім беру ресурстарының теңсіздігі мен ақпараттық шектеулерінің проблемаларын өзгертіп, халықаралық білім алмасуға ықпал етті. Онлайн сервистер мен web-платформалар арқылы географиядан білім алудың көптеген мүмкіндіктері бар. Оқушылар географиялық заңдылықтарды, табиғи құбылыстарды тереңірек түсінеді, теориядан алынған мәліметтерді практикамен байланыстыра алады. Зерттеу жұмысымыздың мақсаты «Bilim All» мобильді онлайн бағдарламасын инновациялық білім беру құралы ретінде перспективаларын талдау және web-платформаларды табысты қолдану жолдарын ұсыну. Мақалада «Қалалар географиясы» пәнін оқытуда авторлық Bilim All мобильді бағдарламасы мен web-платформаларды пайдаланудың негізгі артықшылықтары қарастырылды. Bilim All мобильді бағдарламасының көмегімен «Қалалар географиясы» элективті курсының бағдарламасы құрастырылған. Мобильді бағдарламаға «Қалалар географиясы» пәнінен дәріс, зертханалық және семинар сабақтарының материалдары енгізілген. Сонымен қатар web-платформаларды пайдалана отырып, практикалық тапсырмаларды орындаудың үлгілері көрсетілген. Электрондық ресурстар тақырыпқа байланысты классификацияланып, ресурстарды пайдалану мүмкіндіктері көрсетілді. Жұмыстың нәтижесі ретінде М.Ганди атындағы №92 лицей оқушыларынан алынған сауалнама мен инновациялық технологияларды қолданғаннан кейінгі тест нәтижелері талданды.