БАТЫСТЫҚ ҒЫЛЫМИ ДИСКУРСТА БОЛАШАҚ ПЕДАГОГТЕРДІҢ ЖАСАНДЫ ИНТЕЛЛЕКТ САЛАСЫНДАҒЫ ҚҰЗЫРЕТТІЛІГІН ҚАЛЫПТАСТЫРУДЫҢ ТЕОРИЯЛЫҚ - ӘДІСНАМАЛЫҚ НЕГІЗДЕРІ

Аңдатпа

Қазіргі кезеңдегі педагогикалық білім беру жүйесінде жасанды интеллект технологияларын кәсіби мақсатта қолдана алатын болашақ педагогтерді даярлау мәселесі ерекше ғылыми және әдіснамалық маңызға ие болып отыр. Сондықтан,  мақалада батыстық ғылыми дискурста қалыптасқан теориялық-әдіснамалық тұжырымдар негізінде болашақ педагогтердің жасанды интеллект құзыреттілігін қалыптастыру мәселесіне талдау жасалады. Зерттеудің өзектілігі білім беру кеңістігіндегі цифрлық трансформация үдерістерімен, жасанды интеллект құралдарының оқыту мен бағалау жүйесіне енуімен және педагог мамандарды даярлау мазмұнын жаңарту қажеттілігімен айқындалады. Мақалада жасанды интеллект құзыреттілігі тек технологиялық дағдылар жиынтығы ретінде емес, болашақ педагогтің кәсіби әрекетінде жасанды интеллект құралдарын педагогикалық мақсатқа сай, этикалық жауапкершілікпен және әдістемелік тұрғыдан негізді қолдану қабілеті ретінде түсіндіріледі. Батыстық зерттеулерде жасанды интеллект оқытуды дараландыру, оқу материалдарын жобалау, білім алушылардың оқу нәтижелерін талдау, кері байланыс беру және бағалау үдерістерін жетілдіру құралы ретінде сипатталады. Сонымен бірге жасанды интеллект технологияларын қолдану барысында академиялық адалдық, деректер қауіпсіздігі, алгоритмдік қателіктер, технологияға шамадан тыс тәуелділік және педагогтің сыни ойлауы мен кәсіби дербестігінің әлсіреу қаупі сияқты мәселелер туындайтыны көрсетіледі. Зерттеу нәтижесінде болашақ педагогтердің жасанды интеллект құзыреттілігін қалыптастыру техникалық дайындықпен шектелмей, әдістемелік, этикалық, бағалау, рефлексивтік және қауіпсіздік компоненттерімен кешенді түрде жүзеге асырылуы қажет деген қорытынды жасалады.