АТАЛЫҚ БҰҚАЛАРДА СУБФЕРТИЛДІЛІК СИНДРОМЫН БАЛАУҒА TETRA-PRIMER ARMS-PCR ӘДІСІН ОҢТАЙЛАНДЫРУ

Аңдатпа

Жұмыстың авторлары шетелдік және отандық селекцияның әртүрлі тұқымындағы аталық бұқалардағы субфертильдік синдром тасымалдаушыларын анықтау үшін Tetra-PRIMER ARMS-PCR реакциясының жүргізу шарттарын оңтайландырған. Реакциялық қоспаның соңғы көлемі 25,0 мкл болғанда, тура және кері сыртқы және ішкі праймерлердің оңтайлы концентрациясы эксперименталды түрде анықталған және ол әрбір праймерлер көлемі 1,0 мкл мөлшерінде болған. Келесідей температуралық режим тиімді болды: алғашқы денатурация 95°С – 5 мин, амплификацияның бірінші кезеңінде циклдар саны 17, денатурация 94°С -30 сек, праймерлердің жабысуы 68°с – 30 сек, әр цикл ішінде температура 1°С төмендеген, элонгация 72 °С – 30 сек, келесі денатурация 94 °С – 30 сек циклдар саны 30, праймерлердің жабысуы 51 °С – 30 сек және элонгация 72°С -30 сек, аяқтаушы синтез 72°с -5 мин. Магний хлориді концентрациясының өзгеруі TMEM95 генінің амплификация процесінің нәтижесіне айтарлықтай әсер етпейтіні анықталды. Осылайша, TETRA-PRIMER ARMS-PCR оңтайландырылған әдісімен Қазақстан Республикасының үш асыл тұқымды орталығықтарында, барлығы 223 асыл тұқымды бұқалар тексерілген, субфертилділік синдромының бір гетерозиготалы тасымалдаушысы, шетелдік селекцияның симментал тұқымды аталық бұқасында анықталған, аталық бұқаларда зерттелген генетикалық ақаудың кездесуі төмен болды және ол 0,44%- ды құрады.