БОЛАШАҚ БАСТАУЫШ СЫНЫП МҰҒАЛІМДЕРІН КІРІКТІРІЛГЕН ОҚЫТУҒА ДАЙЫНДАУ ЖҮЙЕСІНДЕГІ ЭЛЕКТРОНДЫ ОҚУЛЫҚ

Аңдатпа

Мақалада бастауыш сынып оқушыларын кіріктірілген оқытуға болашақ педагогтарды даярлау процесінде электронды оқулықты қолдану мәселесіне теориялық шолу және эксперименттік зерттеу ұсынылған. Мақаланың мақсаты – болашақ бастауыш сынып мұғалімдерін кіріктірілген оқытуға даярлау процесінде электронды оқулықтың тиімділігін анықтау. Зерттеу мақсатына жету үшін авторлар теориялық (ғылыми жарияланымдарды талдау, синтездеу, жалпылау және жүйелеу) және эмпирикалық (педагогикалық эксперимент, бақылау, тестілеу, сараптамалық бағалау) әдістерді қолданды. Эксперименттік деректерді тексеру үшін Пирсон критерийі, корреляциялық талдау және сараптамалық бағалау әдістері пайдаланылды. Эксперименттік зерттеу екі кезеңде жүргізілді және Ә.Марғұлан атындағы Павлодар педагогикалық университетінің «Бастауыш оқытудың педагогикасы мен әдістемесі» білім беру бағдарламасы бойынша дуальды оқыту нысанындағы студенттері қатысты. Электронды оқулықты әзірлеу және сынақтан өткізу «Жас ғалым» жас зерттеушілерге арналған гранттық жоба аясында жүзеге асырылды. Зерттеу қорытындысында «Бастауыш оқытудың педагогикасы мен әдістемесі» білім беру бағдарламасы бойынша білім алушылармен электронды оқулық негізінде жүйелі жұмыс жүргізу оң динамикаға қол жеткізуге, сондай-ақ теориялық білімнің толық әрі жүйелі меңгерілуіне және бастауыш сынып оқушыларын кіріктірілген оқыту үдерісінде педагогикалық дағдылардың дамуына ықпал еткені анықталды.